General Santos City—Mitahan sa iyang kaugalingon ang usa ka sundalo nga nailang si Jason Lao, 24, nakabase sa Joint Task Force Gensan, residenti sa Purok Udagre, Barangay Conel, human nga iyang napusilan ang usa ka lineman nga giilang si Aris Joyno, 33 anyos, nga taga Silway, barangay Dad. West, Gensan alas 4:20 ang takna sa hapon kagahapong adlawa.
Sa inisyal nga imbistigasyon sa kapulisan nag-ugat ang pagpamusil human nga nalangan ang biktima sa pagtaod sa linya sa kuryenti sa balay sa sundalo.
Nasayran nga dugay nang gikontrata sa suspek ang nahisgutang lineman apan dugay matud pa kining nataod butang nga gikasuko sa sundalo. Kagahapong adlawa iyang gitawagan ang biktima nga paadtuon sa ilang balay sa Conel ug mao pay pagkanaog sa lineman sa habal-habal nga gisakyan niini gipusil na kini sa suspek igo sa iyang kamot ug sa iyang tiyan nga bahin.
Gilayon nga nakadagan ang biktima ug nakapangayog tabang sa kapulisan kansa maoy nagdala kaniya sa ospital. Samtang ang suspek gilayon man nga nitahan ngadto kang Col. Adonis Bajao, Commanding Officer sa Joint Task Force Gensan human sa insidenti.
Sa karon ang sundalo anaa na balhog sa silda sa Police Station 4 ug giandam na ang kasong ipasang-at batok sa nahisgutan.
