*Shoot to kill ginmandu sang mayor sang Murcia sa Negros batuk sa mga drug users kag pushers*
*MURCIA, NEGROS OCCIDENTAL* – Ginmandu na sang alkalde sang banwa sang Murcia sa Negros Occidental ang ‘shoot-to-kill’ batuk sa mga drug users kag pushers sa iya lokalidad.
Sa iya public address, nagpagwa sang order si Mayor Andrew Montelibano sa iya pulis sa Murcia PNP nga ubuson ang mga drug users kag pushers ilabi na ang mga nakapaidalum na sadto sa rehabilitation program apang liwat karon nga nagbalik sa ila bisyo kag negosyo.
Suno kay Mayor Montelibano, may ginauyatan siya nga listahan nga iya na karon ginapatutukan sa police kag ginapahimuan sang kumpleto kag detalyado nga report bilang manifest of support sa kampanya ni Presidente Duterte sa illegal drugs.
Angut sini, ginahangkat sang alkalde ang mga pulis nga magtriple time sa ila kampanya agud matinluan ang banwa sang Murcia sa illegal drug activities.
May mga kabarangayan na sa Murcia nga gindeklara nga drug free. Ini amu ang Barangay Damsite, Iglau-an, Canlandog kag Cansiliyan. Ang Murcia ang may 23 ka mga barangay.
Sa bilog nga probinsya, 84 sa 601 barangays sa Negros Occidental ang gindeklara na nga drug-free, sa diin ini ang ara nalang slightly-drug affected province.
Ang declaration nga mangin drug-free barangay ang basi sa parametro sang Dangerous Drugs Board basi sa consolidation kag validation report ang Philippine Drug Enforcement Agency lakip man sang Philippine National Police gikan sa report sang Barangay Drug Abuse Council.
Ang lugar ang ginakonsedera nga slightly drug-affected kon manubo sa 2% sang total barangay population ang drug personalities kaangay sang users, pushers kag financiers.
PDEA, PNP,
