Davao City – Natumbok na sa Bureau Fire Protection Davao City ang tinubdan sa pag-ulbo sa sunog sa E.Bustamante Central Elementary School sa Tibungco kagabii.
Suma ni Senior Fire Officer 1 Ramil Gillado nga short circuit ang hinungdan sa pag ulbo sa kalayo gikan sa Alternative Learning System room alas 7:55 kagabii.
Segun ni Gillado nga paspas mikanat ang kalayo sa 13 ka mga lawak hangtud na-ugdaw kini sanglit karaan na ang mga classrooms ug prone kini sa kalayo.
May posibilidad nga nagkadikit ang mga wires sa kuryente ug kisame sa ALS room mao mi-spark resulta sa pag-ulbo sa sunog diin lakip na naabo ang heritage room nga natukod pa niadtong 1930.
Niabot pa sa second alarm ang sunog ayha nadeklara nga fire out pasado 10:00 kagabii diin anaa sa 1.4 milyones ka pesos ang kinatibuk-ang damyos sa insidente.
Gikaguol karon sa mga magtutudlo ang pagkasunog sa ilang tulonghaan tungod kapin usa ka libo ka mga estudyante ang apektado sa mao nga panghitabo.
RadyoMaN Joel Viray
