Davao City – Kadaugan dili lang sa mga environmental advocates apan usab sa kinatibuk-ang kinaiyahan human na-aprubahan sa krusyal nga second reading ang giproposar nga amendment sa ordinansa bahin sa Shrine Hills isip Urban Ecological Environment Sub-Zone sa syudad sa Davao.
Sumala ni Interface Development Interventions Inc. Executive Director Chinkee Golle, kapin usa ka dekada na ang ilang kampanya bahin sa Shrine Hills gani grabe ang ilang kalipay human nakadesidir na ang konseho sa pagprotektar sa maong lugar.
“Amo (IDIS) lang pod i-emphasize na unsa man ang kadaugan para sa Shrine Hills is not just for the environment but also for the landowners kay dili man ni siya naga violate ta sa ilang property rights but it’s more on protecting them to possible environmental hazards,” tataw ni Golle.
Gani karon ang hagit alang sa IDIS mao ang pagkumbinse sa mga land owners nga mu-invest sila sa public parks kun ang ilang giproposar nga Privately-Owned, Publicly Open Spaces (POPOS) kauban sa LGUs.
Samtang positibo si Golle nga mapasa kining ordinansa sa third and final reading sa mosunod nga session.
Atol sa nahitabong 35th regular session, nakakuha og boto nga 23 gawas sa 24 ka mga presenteng konsehal ang maong ordinansa diin usa ka konsehal ang nag abstain.
Punto ni Councilor Elias Lopez nga dili maka-cater ang maong giproposar nga ammendment sa mga small land owners kinsa angay makaangkon og disenteng kapuy-anan ug lugar aron mapalambo ang ilang pamilya.
RadyoMaN Jason Amisola
