Signal jam sa cellphone, gisugyot sa PNP Valencia karong Disyembre 12

Gikonsidera sa Valencia City Police Station ang signal blockage atol sa duha ka dagkong kalihukan sa siyudad karong Disyembre 12 ning tuiga.

Sa interview sa RMN Malaybalay ngadto kang PSupt. Ritchie Yandog, ang hepe sa Valencia City – PNP gibutyag niini nga mao kini ang ilang gikonsidera sa peace and order council alang karong Disyembre 12, adlaw nga Miyerkules atol sa opening sa pinakadakong mall sa Bukidnon ug pagbukas sa charter day sa dakbayan sa Valencia.

Matud ni Yandog nga kung ma-aprubahan ang mao nga proposal himoon kini sa tanang mobile networks.


Sigun sa opisyal nga dili lang sa selected areas sa mao nga siyudad ang signal jamming kon dili sa tibook Valencia City.

Sa karon ila nang gipasa ngadto sa city council ang mao nga proposal ug e-endorso ngadto sa NTC.

Ila kining gihimo isip kabahin sa security plan atol sa mao nga duha ka dagkong kalihukan sa Disyembre 12.

Giklaro ni Yandog nga proposal kon sugyot pa lang ang mao nga paghimo sa signal jamming.

Kung ma-aprubahan, walay signal sa tanang networks sa tibook sa Valencia sa mao nga adlaw sa alas 6 sa buntag hangtod alas 12 sa udto ug alas 6 sa gabie hangtod sa alas 12 sa tungang gabie.

Nasayran nga adunay ipahigayon nga parada atol sa maong kalihukan.

Nangayo usab ug dispensa daan ang PNP ngadto sa publiko nga ma-apektahan sa ilang himoon nga security measures.

Facebook Comments