Moabot karon ngadto sa 500 ka mga pulis ang gipahiluna sa syudad sa Cagayan de Oro ug Iligan. Kini aron mas palig-onon pa ang siguradad sa duha ka mga syudad human sa nahitabong pagbusikad sa bomba sa Isulan, Sultan Kudarat.
Matud pa sa impormasyon nga gihatag ni Supt. Surki Serenas, ang spokesman sa Camp Alagar, ang 350 ka mga pulis dinhi sa Cagayan de Oro madestino samtang lain pang 200 ang ipadala ngadto sa Iligan para sa fiesta sa maong syudad sa umaabot Sept. 29.
Nasayran nga ang maong order nagikan kang police regional director Chief Supt. Timoteo Pacleb nga nagsugod niadtong adlawng Huwebes.
Sa maong order, apil na niini ang pagpahiluna sa mga checkpoints ug dugang police visibility sa duha ka mga syudad, kini ang CDO ug IIigan.
Kahinumduman nga naka red alert na ang Northern Mindanao gumikan sa hulga sa terorismo. Subay niini, matud pa ni Serenas nga ang maong lihok nakapunting aron malikayan ang susamang hitabo diin nibusikad ang usa ka bomba sa Isulan, Sultan Kudarat.
