General Santos City—patay ang 3 ka mga biktima samtang 1 ang kritikal sa pagbangga sa kotse ug traysikad sa National Highway sakop sa LIon LIedo St., Barangay Lagao Gensan ala 1:10 ang takna sa kabuntagon, Byernes, July 14, 2017.
Mga biktimang namatay nailhang silang si Casir Arham Tago, legal age, sikad driver, residenti sa prk. Darusalam, Barangay Labangal; Bob Cambongga, 22, residenti sa Prk. San Juan, Barangay West; ug Jan Roger Ngilay, 18, grade 10 student ug residenti sa Prk. Saway, Barangay Labangal.
Samtang giila ang biktimang anaa sa kritikal nga kondisyon nga si Jessie Ray Yoson, legal age, residenti sa Prk. Silway, West.
Subay sa inisyal nga imbistigasyon sa Traffic Management Unit, pinaagi ni Po1 Joel Quilindreno, Traffic Investigator nga nabanggaan sa TUCSON HYUNDAI nga nakarehistro sa usa ka iladong negusyante sa Gensan nga gimanihuan sa suspek nga si Carlito Pao Awid, nga taga Prk. Sugod, Barangay Apopong Gensan ang traysikad nga gimanihuan ni Casir Arham Tago hain nangalagpot ang mga sakay niini nga miresulta sa kamatayon sa 3 ka biktima ug pagkaangol sa laing usa pa. Nadala pa ang mga nahisgutan sa ospital apan gideklarang dead on arrival.
Nasayran nga anaa sa Oposite Direction ang kotse gikan sa Hadano padulong sa dalan atubangan sa NFA samtang ang traysikad gikan sa Lagao pauli na unta sa ilang tagsa ka panimalay . subay sa nakakita kusog ang dagan sa maong sakyanan hinungdan nga pagbangga kusog kaayo ang impact.
Giangkon usab sa driver sa sakyanan nga siya hubog samtang nagmaniho sa iyang sakyanan apan iyang gihingusgan nga tama-tama lang ang iyang nainum. Iyang aligasyon nga nikalit lang ug butho ang sikad, siya naglisod nag likay mao nga iya gyud kining nabanggaan.
Mga pamilya sa biktima ang desidido nga mupasang-at ug kaso batok sa driver human ilang nasayran nga nagmanihong hubog ang nahisgutan. sumala ni Jojo Melgazo, uyuan ni Bob Combonga nga kung dili hubog ang driver ila pa unta nga madawat ang kamatayon sa iyang pag-umangkon tungod ila nalang dawaton nga disgrasya gyud ang nahitabo. Apan tungod hubog ang suspek maglisod silag dawat niini.
Samtang gawas sa Reckless Imprudence Resulting to Multiple Homicide posibli usab nga mag atubang ug lain pang kaso ang suspek tungod sa pagmaniho niining hubog sa iyang sakyanan.
