General Santos City—Malampusong nasikop sa operatiba sa Police station 2 ang anak sa kanhing Barangay Kagawad sa Barangay Sinawal kansa may kasong lugos atol sa gihimong Manhunt Charlie didto sa Barangay Batotitik, Tboli, South Cotabato alas 2:00 ang takna kagahapong adlawa.
Suspek mao si Jan-jan Bantilan, hingkod ang panuigon ug residenti sa barangay Sinawal ug temporaryong nagpuyo sa Barangay Batotitik, Tiboli.
Nasikop ang nasangpit pinasikad sa warrant of arrest sa kasong rape nga gipagula sa korte niadtong Setyembre 22, tuig 2012. Wala na mipalag ang suspek dihang gipresenstar kaniya ang warrant of arrest sa kasong iyang giatubang.
Si Jan-jan Bantilan, anak ni Sinawal former kagawad Bantilan ang una nang nakasuhan gumikan sa pag-among among matud pa sa usa ka minor de edad pipila na ka tuig ang nakalabay.
Sa karon ang nasangpit baghog sa silda sa Police Station 2 ug commitment order nalang ang gihuwat aron nga mabalhin na kini sa Gensan Reformatory Center.
