South Cotabato-Dakpan ang duha ka mga gituohang motornapper didto sa Barangay Lamhaku Tboli, South Cotabato alas-8:30 sa buntag niadtong nakalabayng adlaw.
Giila ang mga dinakpan nga silang si Samer Makmod, 28, ug Rokami Mohammad, 21, pulos nagpuyo sa Purok 4, Barangay Talitay, Maslabong, Buluan, Maguindanao Province.
Nasayran nga ang mga suspek maoy gitudlong responsabli sa pagpangawat sa motorsiklo nga gipanag-iyahan sa biktimang si Alonie Macarriola Bonifacio, residenti sa nasangpit nga lungsod.
Gikaingong igo lang nga gibilin ni Bonifacio atubangan sa Je-ans Bakery nga nahimutang sa Barangay Poblacion ang iyang motorsiklo dihang kini gikawat.
Gilayon man nga nagpahigayon ug hot pursuit operation ang Tboli Municipal Police Station nga miresulta sa pagkasikop sa mga suspek ug pagkarekober sa motorsiklo sa biktima.
Sa karon giandam na ang kasong gikatakdang ipasang-at batok sa mga suspek kansa pabilin karon nga nabalhog sa silda sa kapulisan.
