Mokabat sa kapin 300,000 pesos ang nakumpiskang iligal nga druga sa usa ka sikyu kaganinang kadlawon. Kini atol sa anti-illegal drug buy bust operation nga gilusad sa hiniusang pwersa sa PNP Drug Enforcement Group (DEG-10), SOU-10, RDEU-10, RECU ug sa PS7 Bulua diha sa Zone 8, Brgy. Bulua ning syudad sa Cagayan de Oro.
Naila ang dinakpan nga 35 anyos nga si Janel Colano, minyo nga Security Guard ug residenti sa Zone 2, Lower Bulua ning syudad. Samtang padayong gipangita karon sa otoridad ang kauban ni-ining si Jessie alyas Bading nga residenti sa Brgy. Kauswagan kung diin nakasibat kini sa maong operasyon.
Nakumpiska sa suspetsado ang usa (1) ka gamay’ng pakite sa gituhoang shabu nga dunay gibug-aton sa 0.20grams nga maoy buy bust item. Usa (1) ka sling bag nga kolor itom kung diin nakasulod ang upat (4) ka mga pakite sa gituhoang shabu, duha (2) ka mga dagko ug duha (2) ka mga gagmay’ng pakite nga gibana-banang motimbang sa 50 gramos nga dunay estimated street value nga moabot ngadto sa 340,000 pesos.
Lakip nga nakuha sa suspek ang 1000 peso bill nga ginamit isip buy bust money ug ang touch screen nga cellphone nga maoy ginamit ni-ini sa iligal nga mga transaksyon.
Detinado na karon ang nasangpit nga suspetsado samtang giandam na ang kasong atubangon ni-ini nga dunay kalapasan sa R.A. 9165 ngadto sa korte.
Facebook Comments
