General Santos City–Gikakurat ni Pastor Ernesto Anical ang pag-igo sa ipo-ipo ngadto sa ilang simbahan nga mao ang Church of Nazarene nga nahimutang sa Purok 7, Barangay Fatima, Gensan nga nahitabo nidtong Martes sa hapon.
Matud ni Pastor Anical nga wala siya sa ilang balay nga nahimutang duol lang sa simbahan dihang nahitabo ang insidenti.
Nakurat nalang kini sa pag uli niya sa ilang balay iyang nakit-an nga wala nay atop ang ilang simbahan ug naguba sad ang pipila ka bahin niini.
Gisaysay usab sa asawa ni Pastor Anical nga si Pastora Febie Anical kung giunsa pagguba sa ipo-ipo ang ilang simbahan.
Sumala pa nga dungan sa kusog nga hangin nagsige ug pangilat ug may pagbundak pa sa ulan.
2 minutos ra matud pang gikuso kuso sa ipo ipo ang ilang simbahan, maayo nalang nga dihang nahitabo kini nakauli na ang mga estudyante sa ilang pre- school kay ug naatlan nga anaa pa ang mga estudyante posibleng aduna gyud madisgrasya tungod sa kakusog sa miigo nga ipo-ipo.
Gikumperma usab ni Pastora Febie nga sa karon aduna nay miadto sa ilang simbahan aron sutaon ang danyos sa pag igo sa ipo ipo sa ilang simbahan.
Gawas niini anaa naman matud pa ang ilang mga kaubanan sa simbahan nga andam mutabang ngadto kanila.
Pero kung may maghatod pa ug tabang alang sa ilang simbahan ila kining dawaton gumikan ila gyud kining kinahanglanon aron paspas nga matukod subli ang ilang simbahan kansa ginahimo usab nilang eskwelahan sa pre-school sa ilang kumunidad.
