Simbahan ginpadlakan ni Kap Ayco kagab-i, tiya sang caretaker kag sakristan, mga gamit ginpaguwa

1124

BAGO CITY – Personal nga nagpadangat sang reklamo sa Unang Radyo unang Balita Sunday Edition si Brgy. Kagawad Dalmacio Ariva kag hinablos sini nga si Jo-ann Balmeo Sopia sang Brgy. Abuanan syudad sang Bago matapos nga ginsulod ni Brgy. Kapitan Anjo Ayco sang Brgy.15, syudad sang Bacolod ang simbahan nga ginamisahan sang Iglesia Filipina Independiente.

Suno kay Ariva nga dira sya nagaestar sa simbahan bangud sya ang gintugyanan sang Lolo ni Kapitan Ayco nga magcaretaker sang amo nga simbahan sumugod sadtong 2004 pa.

Ini nga simbahan ginpatindog pa sadtong panahon sang mga Katsila kag sang una Katoliko ang nagamisa dira apang sang nakapatindog na sang bag-o nga simbahan ang Katoliko ginbayaan na ini gani ginpakamaayo sang mga Aglipayan nga mga residente nga magpangayo sang permiso nga mamisahan.

Alas 9 kagab-i, Marso 9 samtang wala si Ariva sa simbahan bangud nagbulig ini sa hinablos nya tungod ginsakitan sang tyan ang anak sini, nag-abot ang grupo ni Ayco.

Ginpagwa ang mga tawo sa sulod bisan pa nga nagakatulog nga tiya ni Ariva nga 68 anyos sa diin ginkurog ang tigulang sa nerbyos.

Ginsunod paguwa ang sakristan lakip man mga gamit kag ginbutang sa kilid sang dalan kag ginpadlock ang simbahan.

Dugang pa ni Ariva nga las onse sang gab-i sang nagpadulong ang sakristan sa balay sang iya hinablos kag nagpabalo sang hitabo.

Gilayon naman ini nga nagpangayo bulig sa mga kapulisan apang wala ini sila ginbuligan.

Gusto kuntani ni Kagawad Ariva nga maabrihan ang simbahan bangud wala naman sang notisya sila nga nabaton nga siraduhan ini.

Isa nga ginakabalak-an ni Ariva bangud may misahan pa nga patay karun sa ila simbahan, kag kuntani ginhatagan man sila sang plaso para makasaylo sila sang insakto kag indi kay sudlon sa tungang gab i kag pangtabugon./ GRACE SUPE

Facebook Comments