Davao City – Giuyonan karon ni Lasang Barangay Chairman Allan Simo-ag ang bag-ohay’ng napasar nga ordinansa sa hawanan sa Konseho ning syudad nga magdili sa mga menor de edad nga makadula og online games sa mga intenet café, pisonet, ug uban pa sa mga adlaw nga ting klase.
Pabor ni Simo-ag sa ordinansa subay sa nasinatiang sitwasyon sa iyang lokalidad diin daghang mga kabataan magbilar og dula sa online games sa mga internetan ug Pisonet bisan lawom na sa kagabhion.
Karon nga may regulasyon na ang syudad kontra sa mga internet café ug uban, may gahum na ang barangay aron sitahon ang mga nanag-iya ug mga tagdumala sa mga internetan ilabi na sa mga minors nga nagadula og online games sulod sa mga adlaw nga may klase, matud ni Simo-ag.
Usa sa mga dili maayong epekto sa mga online games ngadto sa kabataan mao ang pagkawala sa socialization skills kun pag-interact kun paghugoy-hugoy sa mga batan-on, ang pagkawala sa mga dula kaniadto ingon man kakulang sa komunikasyon sa ilang mga ginikanan ug sa ilang mga kahigalaan, dugang sa amahan sa barangay.
Segun ni Simo-ag, maglisod sila og badlong sa mga internet café ug uban pa nga dili mudawat og mga kabataan atol sa weekdays tungod kay wala man silay bala nga mga regulasyon aron maoy ilang basehan sa pagluwas sa mga kabataan gikan sa dautang impluwensiya ug addiction sa mga online games.
RadyoMaN Joel Viray
