Dako ang kalipay sa linibo ka mga BHW kon barangay health workers sa entiro Sarangani Province tungod sa singkwenta (50) kilos bugas nga ilang nadawat matag usa gikan sa Provincial Government sa Sarangani sa pamunuan ni Governor Steve Chiongbian Solon.
Sayo nga naka-angkon og Pinaskuhan ang mga kwalipikadong BHW sa pagpanguna sa ilang BHW provincial federation president Merly Nebres, lakip na mga BNS/barangay nutrition scholar ug mga municipal hospital worker, sa tibuok probinsya sa Sarangani tungod sayo nahatag kanila ang maong mga sinakong premium rice.
Pagpasalamat kini sa Kapitolyo sa Sarangani sa paghago nga mahatud sa mga kabarangayan ug ka-sityuhan ang mga programa sa maayong panglawas sa gobyerno ug sa pag-alalay sa mga medical frontliner nga dili mudaghan ang matakdan sa Coronavirus.
Pinaagi sa serbisyo sa BHW, wala naglisod ang Provincial Health Office ug mga municipal health office nga mag-una ang Sarangani sa entiro Rehiyon Dose nga labing daghan ang nabakunahan nga mga kabataan batok tipdas ug polio karong tuiga.
Samtang sa hisgutan nga COVID-19, dakog papel gihapon ang mga BHW tungod sila ang naglangkob sa BHERT kon Barangay Health Emergency Response Team. Una pa man nakapagawas og kamanduan si DILG Secretary Eduardo Año, dugay na nga na-organisa nila Governor Solon ug Provincial Health Officer Doctor Arvin Alejandro ang BHERT sa Sarangani.
Sa datus sa Department of Health Region 12, walay nadungag nga positive case sa COVID-19 sa probinsya sa Sarangani sa nakalabay nga Disyembre 24 ug Disyembre 25, bisperas ug adlaw sa Pasko, inay aduna pay naka-recover sa balatian. Usa (1) lang pud ang natala nga napaso sa paboto nga sparkler sa Pasko, usa ka minor injury lamang subay sa report sa PHO Sarangani, taga-Maitum, Sarangani Province.
Photo: Martin Fernando Bernad Jr., PIO Sarangani
