Tapaz, Capiz- Patay ang isa ka detachment commander matapos nga ginluthang sang membro sang CAFGU alas 6:10 sang gab-e sa detachment sang 12IB nga nahamtang sa Brgy. Daan Sur, Tapaz.
Ginkilala ang biktima kay Staff Sgt. Ronilo Esoy y Bugahod,40-anyos ang pang-edaron sang Brgy. Dayhagan, Pilar nga nag-angkon sang kapilasan sa iya lawas.
Suno sa imbestigasyon, nagluntad ang indi paghangpanay sa tunga sang biktima kag suspek nga CAFGU member nga ginkilala kay Bonny Jimenez y Catamin,39-anyos sang Brgy Taganhin, Tapaz Capiz sang ini ang naglaong sa iya commander nga ini ang mapauli apang wala ginpahanugotan sang opsiyal sa kabangdanan nga sila ang naka-heightened alert.
Suno sa hepe sang Tapaz PNP nga si Senior Inspector Edwin Luces, una na nga naglisensiya ang CAFGU member sa opisyal agud nga magbisita sa iya pamilya kag ini man ang ginpahanugotan apang pagkahapon liwat naman ini nga naglisensiya kabangdanan nga ginkaakig sang iya commander.
Posible nga nagtanum sang kalain sang buot si Jimenez sa iya opisyal kun sa diin sase sa blotter report sang Tapaz PNP, matapos ang formation nagpadulong ang suspek sa admin office dala ang M16 armalite rifle. Nagsiling pa ini nga “Sir Kamusta Sir” kag ginsundan sang pagpa-arak sang luthang sa biktima gamit ang M16 armalite rifle nga naka-“automatic mode”.
Matapos ang insidente, insigida nga gindakop ang suspek nga sa subong ang yara na nakahunong sa Tapaz PNP samtang narekober naman ang M16 armalite rifle brand Elisco nga may yara sang magazine kag 16 ka mga bala.
Ang bangkay sang biktima ang sa subong yara na sa isa ka punerarya sa banwa sang Tapaz samtang narekober sa crime scene ang 15 tanan ka baseyo sang 5.56mm.
