iFM Laoag – Napnuan ragsak ken ballaigi ti SIRIB Awards 2019 a naisayangkat iti activity area iti Robinsons Mall Annex ti ili a San Nicolas.
Segun ken ni Ilocos Norte Youth Development Officer Mr. Willy Jake Sib-at nga umabot iti 150 dagiti naipaayan ti pammadayaw iti Sirib Awards 2019. Innayunna a ti pannakaisayangkat ti Sirib Awards ket inrubuat ni Senador Imee Marcsos bayat a daytoy ti Gobernador iti Ilocos Norte.
Kinunana pay a kadagupan dagiti napadayawan, uppat a pulo (40) kadagitoy ti karaman iti kategoria ti Individual, National ken sangapulo ket uppat (14) ti Individual International a pakaibilangan ni Miss Ma. Christian Ramos a dati a nagserbi iti Communications and Media Office (CMO) ken maysa kadagiti nangibagi ti Pilipinas iti Ship for South East Asia and Japan Youth Program (SSEAYP).
Immawatda dagitoy awardee ti medalia, sertipiko ken “cash incentive”.
Nakaawat dagiti grupo a naipaayan ti walo ribu a pisos (P8,000.00) dagiti nangiyalat ti balitok a medalia, innem a ribu a pisos (P6,000.00) ti silver ken uppat a ribu a pisos (P4,000.00) ti bronze idinto nga iti international kas ken ni Ramos ket naipaayan ti lima ribu a pisos (P5,000.00) nga insentibo.
Ti SIRIB Awards ket mangipaay ti pammadayaw ket bigbigenna dagiti naggapuanan dagiti agtutubo tapnu itultuloyda ti panagserbida iti kagimongan.
Bernard Ver, RMN News
