Gipanghimakak sa Special Investigation Task Group –Loot ang nanggawas nga taho nga adunay aktibong pulis nga niapil sa pagpamanhig ni Daanbantayan Mayor Vicente Loot niadtong Mayo 13.
Matud ni Cebu Provincial Police Office director , Sr. Supt. Manuel Abrugena base sa affidavit nga giduso ni Loot ngadto sa task group
wa kini magtumbok nga adunay pulis nga apil sa nag-ambush kaniya .
Nagtoo si Abrugena nga kung ugaling aduna may pulis nga nalambigit sa suway nga pag-ambush ni Loot mas dool ang posibilidad nga may kasuko kini sa mayor dihang aktibo pa kini sa serbisyo sa PNP .
Gihulagway ni Abrugena nga anaa na sila sa 55-60% sa kalambuan sa imbistigasyon sa suway nga pagpatay ni Loot .
Aduna nay gisundan ang kapolisan nga persons of interest sa imbistigasyon sa insidente .
Ang mga saksi naglisod usab sa pag-ila sa namusil ni Loot tungod kay pulos kini nagtabon sa ilang panagway .
