Davao City – Human mapasaka ang kasong murder sa korte sa Bansalan, Davao del Sur batok sa suspek nga mipusil-patay kang Davao del Sur reporter Orlando “Dondon” Dinoy padayon gihapong gisusi sa mga awtoridad ang maong gunman.
Sa interbyu sa DXDC RMN Davao kang Police Lieutenant Col. Alan Vergeniza, SITG Spokesperson, nagpabiling at large ang suspek nga si Brandie Mercado Campaner. Sumala ni Vergeniza, si Campaner adunay warrant of arrest sa laing kasong murder didto sa Digos City, Davao del Sur.
Upat ka mga saksi ang gihawiran sa SITG kinsa mga mitudlo pinaagi sa cartographic sketch sa maong suspek nga maoy mipatay kang Dinoy niadtong Oktobre 30, 2021 sulod sa iyang girentahang apartment sa Madre Ignacia St., Bansalan, Davao del Sur. Gikonsidera sa SITG Dinoy nga cleared na ang kaso human nailhan ang suspetsado.
Sa pikas bahin, base sa gipagawas nga statement sa Presidential Task Force on Media Security (PTFoMS), walay kalambigitan sa trabaho ang pagpatay kang Dinoy isip usa ka journalist.
Subay sa inbestigasyon sa Bansalan Municipal Police Station, tulo ang posibleng motibo sa pagpatay ug ang pinakabug-at mao ang personal grudge in relation sa mga kalihukan niini gawas sa pagka-reporter.
RadyoMaN Aimee Guinita
