Gitukod sa kapolisan ang usa ka Special Investigation Task Group aron motutok sa imbistigasyon sa pagpatay sa manag-uyab nga didto na napalgan sa Barangay San Roque sa lungsod sa Liloan .
Ang Regional Director sa Police Regional Office -7 nga si Chief Supt . Debold Sinas nibutyag nga ang SITG panguluhan sa Cebu Provincial Police Office ug kauban niini ang Liloan Police , Cebu City Police Office , Mandaue City Police Office , Criminal Investigation and Detection Group-7 ug ang PNP Crime Laboratory.
Ang CCPO moapil sa pagsusi tungod kay sa wa pa sila mapalgi nga patay na didto sa Liloan nakit-an pa sila nga nag-inom inom sa Mabolo .
Mas gihimug-atan karon ang anggulo nga may kalabutan sa ilang pagkasakop ug fraternity ug love triangle nga posibling motibo sa pagpatay.
Ang duha pulos gihaya karon sa ilang tagsa-tagsa ka panimay sa Tisa dakbayan sa Sugbu .
