Yara karon sa blue alert status ang siyudad sang Iloilo bilang pagpanghanda sa bagyo nga si Kammuri nga ginapahayag posible mangin isa ka super typhoon.
Nagpaguwa si Mayor Jerry Trenas sang executive order 148 nga nagapaidalum sa siyudad sa blue alert status kag ginamanduan sini ang pag-activate sang City Emergency operations Center agud magbantay sa hulag sang bagyo.
Ginpahayag ni Mr. Darwin Papa sang CDRRMC nga sa idalum sang blue alert status, nagakahulugan nga ang regular nga operation center ang pagahimuon nga emergency operation Center kon sa diin ginapahibalo nila ang tanan nga katapo sang line agencies nga mangin handa para sa posible pagsulod sang nasambit nga bagyo.
Suno kay Papa nga importante nga mangin handa ang siyudad agud malikawan ang daku nga kahalitan sang bagyo pananglitan manalasa na ini sa pungsod.
