Davao City – Abri ang mga opisyales sa Barangay Mintal ning syudad sa Davao sa ideya nga mugahin og budget alang sa allowance o honoraria sa mga opisyales sa Sangguniang Kabataan kun mga SK Kagawad sa ilang Barangay.
Sa gihimong session sa nasangpit nga Barangay kagahapong adlawa, Nobyembre 8, 2018, gituki ni Barangay Mintal SK chairman Kendall Joyce Abrio atubangan sa mga opsiyales sa Barangay ang SK Resolution No., 0022 Series of 2018 bahin sa SK honoraria diin sa kasamtangan, walay allowances bisan piso ang mga SK Kagawad nga na-elect niadtong bulan sa Mayo ning tuiga.
Busa buot sa SK Mintal nga mugahin og budget ang Barangay Council sa nasangpit nga lugar alang sa mga SK Kagawad, SK Treasurer ug Secretary.
Apan bisan pa man walay problema niini ang mga opisyales, gipasabot sa kapitan sa Barangay nga si Kapitan Rey Amador Bargamento nga ila usang ikonsulta kini sa Commission on Audit kun COA ug Department of the Interior and Local Government kun DILG alang sa pagsunod sa husto nga proseso ayha muhimo og resolusyon nga apilon sa ilang budget alang sa sunog tuig ang SK honoraria.
Hinuon gikalipay sa mga SK kagawad sa Barangay Mintal ang suporta sa ilang mga kadagkuan sama ni SK Kagawad Marlo Joshua Brua kinsa miduso sa maong resolusyon.
Matud pa ni SK Kagawad Brua, angayan lamang nga magahinan og honoraria ang mga SK kagawad lakip na ang SK treasurer ug secretary tungod matud pa sa kabug-aton sa responsibilidad ug public accountability sa maong mga opisyal nga susama ra usab sa uban nga mga opisyales sa gobyerno.
Kung maaprubahan, ang Barangay Mintal ang labing unang barangay sa tibuok nasud nga mugahin ug honoraria alang sa mga youngest elected government officials kun SK Councilors.
RadyoMaN Renz Barbarona
