Davao City – Gipasabot sa SMART/PLDT, Inc., usa ka telecommunication company nga usa sa mga rason nganong hinay ang internet mao ang wala pagsunod sa saktong paggamit sa subscription.
Atol sa 19th Davao City Council 33rd Regular Session via Zoom kagahapong adlawa (September 22, 2020), gibutyag sa representative sa maong telco nga rason niini ang daghang nagagamit kun users sa internet apan limited lang sa pila ka gadget ang gi-avail sa subscription.
“Hindi nila alam na hindi enough ‘yung subscription nila versus sa requirement (na gadget) nila sa bahay. Kaya nagrereklamo po ‘yung iba na bakit mabagal ito (internet),” tataw sa SMART/PLDT Representative.
Nasayran nga nangayo usab ang city council og pagpasabot gikan sa kompanya sa nahitabong pagkawala sa internet niadtong Lunes (September 21, 2020) diin apektado ang dakong bahin sa Mindanao.
Anaa usab ang Globe telco atol sa session, diin gipasalig sa nahisgutang mga kompanya nga mahataga’g solusyon ang problema sa ilang mga subscribers labi na sa paghatag og maayong serbisyo sa umaabot nga abri-klase sa Oktubre.
RadyoMaN Kirby Manzon
