General Santos City–Aminado karon ang labaw sa Gensan City Coastguard nga lisdan gyud sila sa pagmonitor sa mga smuggled nga mga produkto nga gikan sa laing nasud nga ginapasulod sa Gensan agi sa dagat.
Sumala ni Lt. Commander Restituto Concio Jr- tungod sa limitado nilang water asset ug kalapad sa Sarangani Bay dili nila malukop ug bantay ang tananang mga baybayon ug mga panagatan hinungdan nga nagsalig usab sila sa tabang sa ubang law enforcement agency sama sa pnp maritime.
Luyo niini gibutyag ni Concio nga regular man ang ilang mga pagpatrolya sa dagat ug gani pinaagi sa ilang substation sa Balut Island nakakumpiska na usab sila ug mga sigarilyong iligal nga gipalusot gikan sa Indonesia.
Tungod sa mga nadiskobrehang mga peke ug smuggled nga produktong sigarilyo sa palengke sa Gensan, gikanayon sa opisyal nga ila pang pakusgan ang ilang seaborn patrol alang sa hugot nga pagbantay. (Jordan Britos)
