TACLOBAN CITY – Sobra 3,000 nga mga kabataan an masulod ha makeshifts classrooms tinikangan sunod nga semana partikular Ha Northern Barangay han Tacloban.
Sumala kan DEPED Tacloban City Division Superintendent Thelma Quitalig, mayada 88 nga Temporary Learning Spaces an gagamiton han mga kabataan nga nahibalhin upod an ira pamilya ha nothern relocation sites tikang ha coastal communities nga nadistroso han bagyong yolanda.
Ha pito nga bag-o nga eskwelahan, duha la dinhi an mayada permanente nga classrooms. An lima in naghimo la anay hin temporaryo nga classrooms gamit an plywood ngan coconut lumber.
Dugang han opisyal, naghuhulat pa hira hin pondo tikang ha DEPED Central Office para magtindog hin permanente na nga classrooms ha northern barangay.
Sobra 10,000 nga pamilya an nahibalhin na ha ira bag-o nga balay ngan sobra pa 4,000 an nagpapabilin pa ha coastal areas.
Nangangahinanglan an Tacloban City hin 656 nga bag-o nga classrooms. Sumala kan Quitalig, pag madownload na an budget ha DEPED Tacloban Division in titikangan dayon nira an pagpatindog hin mga classrooms.
