TACLOBAN CITY – Sobra 3,700 nga job order workers han Department of Public Works and Highways (DPWH) Regional Office 8 ngan 13 nga district offices an nawarayan hin trabaho tungod han waray ka-aprubahi an 2019 national budget.
Basi ha record han DPWH Region 8, 3,786 nga job order workers han nasabi nga ahensya an waray na magreport ha trabaho tinikangan han Enero 1, 2019.
Waray ma-aprubahi an 2019 P3.757 trillion General Appropriations Act, rason kun kayano apektado an mga job workers han nasabi nga buhatan.
Sumala kan Tonette Lim, DPWH Regional Information Officer, waray ma-aprubahi an 2019 National Budget sanglit diri makakapa-sweldo an ira opisina ha mga apektado nga JO workers.
Unfair gihapon para ha mga JO workers kun masulod pa hira ha trabaho nga waray man ginlalauman nga sweldo.
Ha Information Office han DPWH Region 8, 5 nga JO workers an apektado.
Dugang ha pamahayag ni Lim, dako an bulig han mga JO workers ha ira nga mga regular nga empleyado han ahensya para maibanan an ira mga trabahuon.
