[image: images.jpg]
Hapit na misangko ngadto sa 400 ang kaso sa mga insidenteng may kalabutan sa pagpamusil nga natala sa kapolisan sa Soccsksargen region alang ning tuiga.
Base sa datus gikan sa Police Regional Office 12 adunay natala nga 387 shooting incidents gikan Enero hangtud Hulyo ning tuiga.
Sa maong ihap sa mga kasong may kalabutan sa armas nitala sad og 274 ka mga biktima ang napatay samtang 126 ang nahimong samaron sa mga insidente ug 23 ang nakaluwas sa kamatayon.
Dugang sa datus sa kapolisan sa rehiyon pinakadaghang kaso nga natala ang probinsya sa North Cotabato nga adunay 159 ka mga shooting incidents gisundan kini sa South Cotabato na may 68 nga kaso.
Nitala sad ang probinsya sa Sultan Kudarat og 61 ka mga kaso gisundan sa siyudad sa Cotabato City na may 39 ka mga kaso sunod ang General Santos City na may 38 ka mga kaso dayon ang probinsya sa Sarangani na may 22 ka mga kaso sa pagpamusil.
Giklaro sad sa PRO 12 na sa maong mga ihap adunay 60 gikunsiderang solve cases o na-file ang kaso sa korte og naaresto ang suspek samtang 67 ang cleared o na-file ang kaso sa korte apan at-large ang suspek ug 260 ang gikunsiderang under investigation sa kapolisan.
