Davao City – Suportado sa Youth for Peace Mindanao ang giduso ni Laguna Congressman Dan Fernandez nga magdili sa mga kabataan nga nag-edad og 12 anyos paubos nga makagamit og internet ingon man mga social media platforms.
Gibutyag ni YPM Focal Person Kenneth Pagaro nga angay unta nga ang kabataan ma-expose og maayo sa tradisyonal nga mga dula kauban ang ubang bata ug dili diha sa social media or mga socmed sites kay mao unya kini ang mudaot ug maghatag kanila og suliran.
Hinoon dakung kontra si Pagaro sa tinguha ni Fernandez nga limitahan og hangtud 30 minutos lamang kada adlaw nga internet access ang mga nag-edad og 13 anyos ngadto sa 17 sa rason nga daku’g tabang ang internet sa ilang pagtoon sama sa pag-research.
Dugang ni Pagaro nga dili angay himoong ignorante sa teknolohiya ang mga batan–on karon inay tugtan ug pasagdan sila nga mag-enjoy ingon man mag-diskubre sa modernong kagamitan, kahibalo ug pamaagi.
Segun ni Pagaro, angayang isangun na lamang ngadto sa mga ginikanan ang responsibilidad sa pagbadlong, pagdisiplina ug pagkontrol sa ilang mga kabataan diha sa paggamit sa internet kun social media.
Kung aduna may angay idugang sa balaud, kana mao ang hingpit nga pag-ban sa mga online games sama sa Mobile Legends kun ML nga gikabuangan karon sa kadaghanan dagku man or batan-on ingon man access diha sa mga pornographic sites tungod sa negatibong impluwensiya nga malagmit mamugna niini diha sa kinabuhi sa atong mga kabataan.
RadyoMaN Joel Viray
