Davao City – Hatagan og kagawasan ang mga kumpanya nga makapili kung ila bang istriktohan ang mga empleyado nga makagamit og cellphone ug social media sa oras trabaho.
Suma ni Sentro Labor Organization Davao Chapter focal person Michael Ybanez nga magdepende na sa mga kumpanya kun did-an ba nila o dili ang ilang mga trabahante nga makagamit og cellphone ug social media panahon sa trabaho.
Ug kun duna may angay istriktohan kana walay lain ang mga empleyado sa gobyerno sanglit sweldado sila sa katawhan kun mga tax payers mao nga dili sila angay magbulakbol, segun ni Ybanez.
Gibatbat ni Ybanez, angay una sutaon ang tumong sa Valenzuel City ngano nagpasar sila og ordinansa nga nagbawal sa mga trabahante nga mugamit og cellphones ug mga gadgets sa oras sa trabaho.
Nagduda kini nga gumikan nabaniog ang Valenzuela City nga walay pagtagad sa safety measures sa ilang mga devices mao nga adunay natigayon nga dagkong insidente sa sunog.
Busa nagtoo si Ybanez nga mao kini ang hinungdan ngano nagpasar og ordinansa ang mao nga siyudad sa tinguha nga dili masubli ang sunog sa bisan asa nga buhatan mapribado man o gobyerno.
Sa tan-aw sa focal person nga dili maayo nga adaptahon dayon sa ubang lugar sama sa davao region ang ordinansa sa Valenzuela kay malagmit dili kini haom sa atong dapit.
Apan gipamugos sa Sentro Labor Organization Davao Chapter nga kun aduna ma’y istriktohan sa mga gamit kana dili ang pribadong mga empleyado inay ang mga trabahante sa gobyerno aron dili kalugar og tsismis sa kauban sa trabaho.
Dili pabor si Ybanez nga i-regulate ang pagbaton og cellphones ug paggamit sa social media kay pagpihig kini sa katungod sa mga trabahante ug unsaon na lang kun adunay emerhinsiya dili dayon sila makada-wat og mga impormasyon kun wad-an sila og mga gadgets samtang magtrabaho.
RadyoMaN Joel Viray
