Nagpagwa sang panibag-o nga kamanduan si South Cotabato Governor Reynaldo S. Tamayo, Jr., sa mga returning Overseas Filipino Workers ukon OFWs kag mga bakasyonista nga pinoy nga naghalin sa mga lugar nga gin-ban sang Philippine Government nga magsulod sa pungsod bangud sa panibag-o nga variant sang COVID 19.
Sa ginpirmahan nga Executive Order 66 sang gobernador, ang mga pungsod kasubong sang United Kingdom, DenMark, Ireland, Japan, Australia, Israel, The Netherlands, HongKong, Switzerland, France, Germany, Iceland, Italy, Lebanon, Singapore, Sweden, South Korea, South Africa, Canada kag Spain ang hugot nga ginamonitor sa nasambit nga balatian.
Base sa EO 66, ang magpauli nga OFW kag Filipino travelers nga magsulod sa probinsya ang obligado nga magpaidalom sa 14 days quarantine sa gindisignar nga government facilities, apang ginadumilian naman ang home quarantine.
Patutukan naman sa Barangay Health Emergency Response Teams ukon BHERTs ang minimum health protocols kag pag report sa mga travelers halin abroad.
Samtang, ginmanduan man ang PNP nga mag-alalay sa LGU sa pag-implementar sang nasambit nga EO para mapunggan ang pagsulod sang panibag-o nga strain sang COVID 19 sa probinsya sang South Cotabato.
