General Santos City–Dili pa makahayag sa ilang komento og reaction ang South Cotabato Electric Cooperative II bahin sa giaprobahang resolusyon sa Sangguniang Panglungsod sa Gensan.
Nasayran nga atul sa sesyon niadtong adlawng Martes, giaprobahan sa konseho ang resolusyon nga naghangyo sa SOCOTECO II nga hatagan og 30 porsyento nga diskwento ang mga konsumante sa kooperatiba.
Sumala ni Joy Alora- tigpamaba sa SOCOTECO II, wala pa silay gihuptan nga kopya sa resolusyon hinungdan nga wala pa kini matun-an sa mga miembro sa board sa SOCOTECO.
Kahibaluan nga gihimo sa mga konsehal ang maong lakang tungod sa nagpadayong Enhance Community Quarantine sa syudad nga nakaapekto sa panginabuhian sa katawhan.
Apan sumala ni Alora, dunay laing programa alang sa katawhan ang socoteco, kung asa ilibre na sa bayrunon ang mga miembro nga mukunsumo lamang og 50watts matag bulan.
Kini pinaagi matud pa sa Pantawid Liwanag Program sa kooperatiba kung asa mukabat sa singkwenta mil ka mga miembro konsumante ang maka-benepisyo niini.
Dili pa hinuon masiguro sa SOCOTECO kung hangtud kanus-a mulungtad ang maong programa tungod magdepende kini kung hangtud kanus-a usab mahuman ang community quarantine.
Apan gilauman ni Alora nga sa bulan sa Mayo makabalik na sa aktwal nga meter reading ang socoteco.
Posible gihapon matud pa nga dunay himuong adjustment alang sa mga miembro nga gamay ra ang makonsumong kuryente sa matag bulan.(Jordan Britos)
