General Santos City–Daghang pasabog ang gilauman ni Gensan City Mayor Ronnel Rivera sa umaabot nga SONA ni Presidente Rodrigo Duterte.
Pamahayag sa mayor nga adunay daghang isyung gi-atubang ang presidente kung asa iyahang gilauman nga kini ma-klaruhan sa maong SONA.
Nag-unang isyu matud pa amo ang ekonomiya, operasyon sa droga ug uban pa, kung asa iyahang gilauman nga mas hatagan ug pagtagad sa presidente ang ekonomiya nga maoy basehan kung maayo ang pagdumala sa usa ka nasud.
Dugang pamahayag ni Mayor Rivera nga kung hisgutan ang pagpatuman sa balaud sa nasud taas ang grado nga iyahang ihatag kang President Duterte.
Apan kung hisgutan ang ekonomiya, alang kaniya nga angayan pa nga mas hatagan kini ug igong pagtagad. Pag-angkon niya nga aduna may kalambuan sa ekonomiya sulod sa duha ka tuig nga paglingkod sa presidente.
Dako man usab ang iyahang panghinaut nga maghatag pa ug mas daghang trabaho alang sa katawhan ang kasamtangang administrasyon.(Lore Romualdo)
