Davao City – Gibana-banaang anaa sa kapin kun kulang usa ka libo ka mga raliyista ang nagtapok sugod alas-10 karong adlawa sa Freedom Park, Roxas Avenue, ning syudad alang sa pagprotesta atol sa ika-upat nga State of the Nation Address ni Pres. Rodrigo Duterte.
Atol sa interbyu kang Jong Monzon, usa sa mga mipartisipar sa lihok-protesta, nanawagan kini nga hingpit wagtangon na ang kontraktwalisayson sama sa kaniadto pang saad sa presidente ug pagbakwi sa China ang West Philippine Sea.
Gawas niini, nanghinaot usab ang uban pang mga raliyista nga ibalik ang operasyon sa Salugpungan schools ingon man proteksyon sa katungod sa mga lumad.
Sa pikas bahin, gihatagan og bagsak nga grado ni Karapatan Southern Mindanao Secretary General Jay Apiag ang presidente gumikan sa kapakyasan niini nga masolusyonan ang mga nag-unang problema sa nasud partikular ang kontraktwalisasyon, repormang agraryo ug uban pa.
Samtang anaa ang presensya sa awtoridad sa maong lugar aron mapaniguro ang kahapsay ug kalinaw sa maong lihuk-protesta.
Sa pikas bahin gi-imbitahan sa lokal nga panggamhanan ang mga Dabawenyo nga mutan-aw ug maminaw sa pagahimuong SONA nga mag sugod alas-4:00 sa hapon diin nagmontar og LED TV sa Rizal Park ning syudad sa Davao.
RadyoMaN Jason Amisola
