Naistoryahan na nila sang South Cotabato Inter-Agency Task Force on COVID-19 upod ang mga negosyante dire sa probinsya suno kay Governor Reynaldo Tamayo Jr., ang amat-amat na nga pagbalik sa pipila ka economic activities sa probinsya nga nakabase sa apat ka mga criteria.
Suno sa gobernador ang apat ka mga criteria nga basehan nila sa pagpabalik sang pipila ka economic activities amo ang mga masunod napanubo na ang numero sang COVID-case sa sulod sang 14-adlaw, operational na ang COVID-center , kumpleto ang equipment kag safety sang mga medical team kag may kapabilidad na bala nga magcontact tracing.
Base naman sa ila nga assessment suno kay Governor Tamayo pipila ka criteria ang nacomply naman kapareho na lamang nga wala sang panibag-o nga kaso sang COVID-19 nga may positibo nga resulta ang tikang nga ginhimo nga pagpatuman sang enchanced community quarantine kag calibrated lockdown indi lang sa probinsya kundi sa bug-os nga rehiyon, nangin operational na ang confinement center, yara na sa proseso ang testing laboratory sa Dr. Arturo Pingoy Medical Center nga tigayon na nga nainspeksyon sang WHO kag DOH, ginaproseso na ang pagbakal sang test kits, PPE kag ginaplastar na sang IT department sang provincial government ang system nga gamiton para sa contact tracing.
Ginkumpirmar man ni Governor Tamayo nga unahon nila sa pagresume ang infrastructure projects sang gobyerno nga ipaggwa ang EO subong nga semana.
Dugang pa niya nga sa ipaggwa nga executive order i –define gid kon ano ang establishemento nga buksan nga kinahanglan gid sang katawhan base sa nangin suhestyon sang miyembro sang IATF South Cotabato lakip na ang mga negosyante nga maggwa ang EO bag-o ang Abril 30 suno pa.
