Naglab-ot na sa 96 ang kaso sang COVID 19 nga narekord sa probinsya sang South Cotabato base sa datos sang IPHO sang nagligad nga semana.
Suno kay Dr. Rogelio Aturdido Jr, South Cotabato Provincial Health Officer sa 96 ka kaso sang COVID 19, 23 ang active kag yara na sa isolation area. Sa 23 ka active nga kaso sang COVID 19 nakarekord ang banwa sang Polomolok sang 16 kag ang may sintomas yara na sa nagkalain-lain nga ospital.
Nagagwa sa ila nga pagpangusisa suno kay Aturdido nga nagtambong pa sa birthday party ang isa sa may sintomas kon sa diin nalatnan ang iban nga miyembro sang pamilya. Samtang ang isa nga empleyado nag-ubra pa bisan may sintomas na nga ginadala.
Samtang tungod madamo na sang nalatnan sang COVID-19 kag may clustering na sang kaso sa banwa sang Polomolok makabig nga may local transmission na, apang ang Department of Health lang suno pa ang makadeklarar nga padayon pa nga ginaimbestigaran.
Nagaapela naman si Dr. Aturdido sa mga pumuluyo nga indi ibalewala ang mga sintomas nga nabatyagan agud nga malikawan nga malatnan ang iban.
Ini suno pa ang rason nga naglapta ang kaso sang COVID 19 sa banwa sang Polomolok bangud ang pasyente nga nagbatyag sang sintomas ang nagtambong pa sa party kag nagreport pa sa iya ubra.
Dugang pa ni Aturdido kon pwede pa lang indi na mag-ubra anay kon may nabatyagan na kapareho sang ubo, sip-on ilabi na kon trangkaso para man sa kaluwasan sang iban.
