Yara sa gihapon sa outbreak level sang balatian nga dengue ang probinsya sang South Cotabato bisan may mga aksyon na suno pa nga ginhimo ang mga barangay, mga municipal kag provincial government.
Samtang suno kay Provincial Epidemilogy Surveillance Unit Officer Cecile Lorenzo nga amat-amat na nga naganubo ang kaso sang balatian nga dengue sang nagligad nga semana sa mga banwa sang Norala, Sto. Niño kag Surallah nga nauna nga nag-aksyon.
Apang ang syudad sang Koronadal suno pa padayon ang pagsaka sang kaso sang balatian nga dengue kag kadam-an sang pasyenti nga yara suno pa sa subong sa South Cotabato Provincial Hospital ang halin sa syudad.
Base sa pinakaulihi nga datos sang Provincial Health Office nagalab-ot na sa 4,172 ang kaso sang balatian nga dengue sa probinsya nga mataas sang 177 percent kumparar sang nagligad nga tuig sa kapareho nga period kag 22 na ang patay halin Enero 1 tubtob July 30.
Nagalab-ot naman sa 102 ka mga barangay sa probinsya ang may clustering of cases kag 10 halin sa 18 ka mga barangay naman ang hotspot areas sa balatian nga dengue.
