South Cotabato–Nagpabiling hapsay ug malinawon ang tibuok Probinsya sa South Cotabato. Kini ang gibutyag ni Police Col. Jemuel Siason, Provincial Director sa South Cotabato Provincial Police Office.
Pagpaklaro niya nga ang mga nahitabong patay sa Probinsya ang dili tanan hinimuan sa mga grupo sa mga kriminal o mga organisadong grupo.
Kini gumikan padayon usab ang ginahimong operasyon sa kapulisan hilabina sa kampanya batok illegal nga droga.
Dugang pamahayag ni Col. Siason nga walay dapat ika-alarma ang katawhan sa Probinsya sa South Cotabato gumikan nagpabiling kontrolado nila ang sitwasyon.
Samtang nauna na matud pa niyang gihatagan ug direktiba ang kapulisan sa Polomolok nga kinahanglan pakusgan ang pagbantay sa seguridad.
Kini ang mando sa Opisyal ngadto sa Kapulisan sa Polomolok human sa sunod-sunod nga pagpamusil nga nahitabo sa maong Lungsod.
Nasayran nga una na usab gimando ni Siason ngadto sa iyang mga sakop nga butangan ug daghang presensya sa kapulisan ang mga lugar nga adunay daghang kaso sa krimen sama sa pagpamusil.(LVR)
