SOUTHERN LEYTE – Naatubang yana ha kaso nga panlugos o rape an Governor han Southern Leyte nga iginsalawad han usa nga daraga. Nahitabo daw an krimen dida han tuig 2016 ha sakob han usa nga SUV. Ngan gintistingan na liwat daw an daraga paglugusa han opisyal pero waray madayon han yana nga Nobyembre 2017.
Ha impormasyon nga nakuha han RMN, sumala han 16 anyos nga biktima nga igintago namon ha ngaran nga Gina, nahitabo daw an panlugos ha iya ni Southern Leyte Gov. Christopher Yap dida han Bise-Gobernador pa ini.
Salaysay han biktima, gin-imbitar hiya han iya mga kasangkayan nga mag-irignom pero diri daw hiya maaram nga ginset-up na ngayan han iya mga sangkay nga mga taga-suporta daw ni Gov. Yap.
Dugang han biktima, han mahubog hiya in ginsakay daw hiya ni Gov. Yap ha pula nga SUV ngan didto hiya ginlugos dapit ha may gasolinahan han bungto han Sogod.
Han yana nga Nobyembre 2017, gintistingan daw hiya utro paglugusa han Gobernador ha sakob han banyo han pareho nga gasolinahan.
Dida han lunes, gin-updan an biktima ni Thelma Chiong han grupo han Crusade Against Violence para pasakahan hin kaso nga rape ngan attempted rape hi Governor Yap.
Umatubang ha media an nanay ni Gov. Yap nga hi Amalia Yap, sumala ha iya, buutan an iya anak ngan bubuhaton daw niya tanan para ipakita nga waray sala an Gobernador.
Mahihinumduman dinhi ha RMN nga naging Gobernador hi Yap tungod nga ginsaliwanan niya hi anay Gov. Damian Mercado nga ginpa-iwas ha pwesto ha sugo han Office of the Ombudsman tungod han ginkaka-atubang nga kaso.
