Nag-order na an Office of the Ombudsman nga tanggalon na ha serbisyo hi Southern Leyte Governor Damian Mercado matapos nga mapamatud-an nga guilty of grave misconduct ha pagpalit han second hand nga mga sarakyan.
Lakip gihapon nga guilty hira Bids and Awards Committee (BAC) Chairman Crispin Arong, Jr., BAC Vice-Chairperson Feorillo Demeterio, Jr.; BAC members Anecito Narit, Benjase Lumen ngan Consuelo Ladrera;ngan supplier Baltazar Avila, Sr. han Kojac Auto Repair Shop and Auto Supply.
An mao nga gobernador ngan lima pa nga local executives in maatubang ha pagdungog ha Sandiganbayan ha pagtalapas han section 3 han Anti-graft and corrupt practices act han Republic Act No. 3019.
Basi ha imbistigasyon, napamatud-an nga dida han 2007, nga an anay Maasin Mayor in gin aprobahan an pagpalit han 3 nga second hand nga mitsubishi pajero, isuzu wizard ngan toyota grandia nga nagkakantidad hin P2.3 Million ha Kojac Auto repair shop.
Nahibaroan nga hi Mercado an tinuod nga nagtatag-iya han grandia nga naibaligya dida han Nobyembre 2006. 13 anyos na an pajero, 11 anyos an toyota grandia, ngan 12 anyos an isuzu wizard.
Basi man gud han Department of Budget and Management National budget Circular No. 446-A, klaro nga waray ha standard han circular an edad han mga sarakyan kumo usa nga kamanduan ha government Procurement Reform Act (Republic Act No. 9184)
Sumala kan Ombudsman Conchita Carpio Morales, nga hi Mercado unta an may kapas nga magsiguro han tanan nga gin papalit han City Gov’t nga nakapailarom han balaod.
