TACLOBAN CITY – Ginpasakahan hin kaso ha Sandiganbayan hi Maasin City Vice Mayor Maloney Labatos Samaco tungod han gin-aaligar maanomalya nga pagpalit P10-M nga communication devices dida han tuig 2007.
Hi Samaco in gin pasakahan ha pagtalapas han Section 3 Han Anti-Graft And Corrupt Practices Act.
Lakip gihapon nga kakasohan hira Bids and Awards Committee (BAC) Chairman Crispin Mendoza Arong Jr., BAC Vice Chairman Feorillo Abiera Demeterio Jr., BAC Members Aniceto Felicilda Narit, Amado Palman Acasio, Encarnacion Lapasanda Lora, Consuelo Segun Ladrera; ngan Private Individual Ma. Luzviminda Lopez han Philflex Trading And General Merchandise.
An anay City Mayor, in gin-aaligar gingamit an iya pwesto dida han ginpalit niya ngan han mga co-accused an mga communication devices sugad han 14 ka set hin Senao long range cordless telephone nga nagkakantidad hin P381,360.00 kada set ngan 26 ka set hin Senao SN-568 station to station units na nagkakantidad P178,751.00 per set nga may handling charges nga P13,408.00
Sumala han prosecution, an kontrata han pagpalit in waray mag-agi hin public bidding kumo pagtalapas ha Government Procurement Reform Act.
Tag P30,000.00 nga pyansa an gin rerekomenda han Sandiganbayan kada usa nga akusado.
