SP-Malaybalay aprobado ang resolusyon pagpinirmahay og MOA alang sa Project SAWAGA

Aprobado sa Sangguniang Panglungsod (SP)-Malaybalay ang resolusyon nga nagmandu sa pagpinirmahay sa Memorandum of Agreement (MOA) tali sa lokal nga pangagamhanan sa Malaybalay, Bukidnon State University (BukSU), Barangay Government Unit sa Barangay 9, Sumpong, ug Kalasungay. Lakip usab ang Natural Resources Environmental Management Bureau (DENR-ENB), Technical Education Skills Development Authority (TESDA)- Bukidnon ug Department of Trade and Industry (DTI).

Kini pinaagi sa resolution no.2023-0309 kabahin sa pagpinirmahay og MOA sa Project SAWAGA kon ang Sustainability and Awareness on Water Adaptation, Governance and Action.

Gi-endorso ang maong resolusyon ni City Mayor Atty. Jay Warren R. Pabillaran adtong nakalabayng Marso 14,2023 kabahin sa pag-otorisa kaniya nga mupirma sa maong MOA.

Ang Project SAWAGA nagtumong nga mapromotar ang sustainable water source management, makamugna og kinatibuk-ang pagsabot sa water adaptation, governance ug action, ug paghatag og technical ug practical nga training sa katawhan ug mga stakeholders.

Suportado sa lokal nga pangagamhanan sa Malaybalay ang maong lakang ilabi na pagkooperar sa academic sector, ug mga stakeholders sa pagpromotar sa environmental sustainability, social responsibility, ug economic development.