Alang sa dugang proyekto ug kalambuan sa probinsya, giaprubahan sa mga miyembro sa Sangguniang Panlalawigan ang pagduso sa mga proyekto nga gihangyo ni Governor Roberto Uy ngadto ni Presidente Rodrigo Duterte pinaagi sa Department of Budget ang Management (DBM).
Sa resolution nga gipasupot ni Board Member Romulo Soliva sa segundo distrito, atul sa ilang regular session kaniadtong Oktubre 14, kini ang nag-endorsar sa proposed infrastructure projects ni Governor Uy alang dinhi sa lalawigan.
Lakip sa maong mga proyekto nga gilaraw sa gobernador nga ibubo dinhi sa probinsya mao ang 2-kilometer Tubod-Ajero Road Section sa Barangay Galas, ning dakbayan sa Dipolog nga nagkantidad ug P30,000,000; 3-kilometer Sibutad-Dilapa Road Section sa lungsod sa Sibutad sa kantidad nga P45,000,000 ug 5-kilometer Mucas-Balakan Road Section sa Barangay Mucas, lungsod sa Salug ning lalawigan sa kantidad nga P75,000,000.
Nasayran nga ang maong resolution tipik kini sa mga rekisitos alang na sa paghangyo sa ayudang pinansyal gikan sa DBM nga ipadapat sa maong mga proyekto. . (PIC-mbmontederamos)
