Naghangyo ang mga membro sa Sangguniang Panlalawigan ngadto sa buhatan sa Department of Education o DepEd nga lugwayan hangtud Disyembre 2020 ang pagamit sa mga tulunghaan isip temporaryong pasilidad sa Isolation o Quarantine sa Probinsya sa Bukidnon.
Kini pinaagi sa Resolution No. 2020-1603 nga gipagula ni PCL President Ex-Officio Board Member Atty. Oliver Owen Garcia nga giuyunan sa tibouk membro sa Sangguniang Panlalawigan.
Matud pa sa maong resolusyon nga gipadala ngadto sa DepEd Regional Office-10 pinaagi kang Director Arturo B. Bayucot, CESO III, nga ang Probinsya sa Bukidnon naghimo sa tanan aron malikayan ang pagkuyanap sa COVID-19 nga dala sa pagdagsang sa mga Locally Stranded Individuals (LSI) ug Returning Overseas Filipinos (ROFs) ug pagbutang kanila sa mga piniling mga lugar aron sila mabulag sa ilang mga panimalay ug makahalubilo sa kadaghanan.
Gumikan sa limitado ang panudlanan nga kasamtangang nasinati sa mga LGU’s sa probinsya gumikan kay naapektuhan sa maong pandemya, ang paggamit sa mga pampublikong tulunghaan mahinungdanon ning panahon sa krisis.
Kini ang hinungdan nga naghangyo ang Sangguniang Panlalawigan sa paglugway sa panahon gikan sa Agosto hangtud sa Disyembre 2020 nga tugutan ang ilang mga lumulupyo nga temporaryong makagamit sa maong mga tulunghaan isip pasilidad sa isolation.
Ang mga LGU’s usab kinasing-kasing nga nag-ila sa tabang sa Department of Education dili lamang ning panahon sa pandemya apan lakip na sa mga natural nga kalamidad diin nahimo kining temporaryong puluy-anan sa mga apektadong residente.
Matud pa usab nga isip pagsunod sa atong naandan nga tradisyon sa bayanihan, ug ubos sa konsiderasyon sa kabalaka sa kadaghanan, ang mga membro sa SP maampoon nga naghangyo sa mga kadagkuan sa DepEd nga sila tugutan sa ilang hangyo.
