Jamindan, Capiz – Duha ka mga katapo sang Southern Front Komiteng Rehiyon Panay CPP NPA ang nagsungka sa 61st Infantry Batallion sang Philippine Army.
Ginpahayag ni Lt Col Joel Benedict Batara, Commanding Officer sang 61IB, ginkilala ang mga surrenderees nga sanday alias Aguila, 51-anyos ang pang-edaron nga amo ang nagatindog bilang team leader sang Special Partisan Unit (SPARU) sang CPP-NPA Komiteng Rehiyon-Panay. Upod sini nga nagsurrender si alias Baby, 33-anyos nga nagaserbe naman nga political guide kag medical officer sang Squad 2, Suyak Platoon, Southern Front, Komiteng Rehiyon -Panay.
Ginsungka ni Alias Aguila nga taga-Calinog, Iloilo ang isa ka unit sang Colt Rifle nga may serial number 9014574; isa ka cap magazine sang 5.56 mm; lima ka rounds sang bala sang 5.56mm, kag isa ka vintage rifle lakip ang napulo ka rounds sang 7.62 ammunitions samtang si alias Baby naman sang Tubungan, Iloilo ang nagsurrender sang isa ka unit sang US Springfield 30 caliber rifle; 18 ka rounds sang bala sang 30 caliber; isa ka unt sang .38 caliber pistol; anum ka rounds sang bala; tatlo ka rounds sang empty shell sang 40mm kag iban pa nga mga importante nga mga dokumento.
Ginsiling sang duha sa interview nga ang tuman nga kagutom kag kabudlay nga ila naagyan samtang yara sa sulod sang hublag amo ang nagtulod sa ila nga magbalik sa sabak sang gobyerno.
Matapos nga magsurrender, mangin resipyente ang mga ini sang Enhanced – Comprehensive Local Integration Program (E-CLIP) kun sa diin pahauna nga P15, 000 ang ila mabaton bilang immediate assistance kag dugang nga P50, 000 nga Livelihood Assistance kag Firearm Remunerations para sa ginsurrender nga mga pusil.
(c)- Philippine Army Spearhead Troopers
