Speaker Pantaleon Alvarez tagpaklaro an opisyal na tagkilaya na mga sakop sa PDP Laban sa Surigao del Norte
Human mitumaw na may duha ka grupo an mga mihimo sa pagpan-recruit ug nagpakilaya na mga sakop sa PDP Laban nan Surigao del Norte, mipadayag nan pagpaklaro si Speaker Pantaleon Alvarez, ini human an pakigtigom didto sa kaulohan kaiban an mga Mayores nan probinsiya.
Pipila sa mga Mayores, an miangkon na sa ila lungsod may mga naglibot-libot, nagpakilaya na tinuod na sakop ug nan-recruit sa PDP Laban na kon diin nagkolekta nan tag-P300 para pagpa-miyembro lakip sa ID ug tshirt.
Sumaya pa sa Speaker, an tagkilaya nila ug nagsilbi na Prov’l. Chairman nan PDP Laban Surigao del Norte amo si Cong. Francisco Jose Matugas II nan District 1, ini may appointment gikan sa ila partido. An polisiya sa partido an matud pa tuyo ra ka personalidad an manguna sa pagpapanumpa sa mga bag-o na sakop sa PDP Laban bugtong sija isip Secretary General o an Presidente nila na si Senate Pres. Koko Pimentel ug Vice Chairman Alfonso Cusi, waya nay lain pa. Kon jaon man nagpapanumpa na lahi na mga personalidad, ini mini o peke, dili valid an pagpasakop.
Dugang pa niini, sa PDP Laban wayay orihinal o dili orihinal na sakop sa partido, pareho ra tanan, an importante na legitimo na miyembro. Pahimangno pa ni Speaker Alvarez sa tanan na dili magpailad ngadto sa mga nanrecruit labi na kon nangajo nan kuwarta para pa-miyembro ug sa ID, hinoon may ila membership fees pero tanan may mga resibo na ihatag.
