Pag-recall sa special permit sa sabong sa MJ Santos gi-question ni Nortega
Gi-question ni City Councilor Cromwell Nortega sa gihimung aksyon sa City Business Permits and Licensing Division nga nag-recall sa Special Permit nga giisyu sa Sangguniang Panlungsod alang sa pagpahigayon ug sabong sa Brgy. MJ Santos ning syudad sa Butuan.
Nibarug sa hawanan sa Sanggunian si Konsehal Nortega aron ipasibaw ang iyang kasigmuyu sa gibuhat sa nasangpit nga buhatan ug gusto nilang ipatawag sa Konseho ang legal officer sa BPLD nga si Atty. Moshie Ariel Cahoy aron ipatin-aw ang maong isyu.
Sigun ni Konsehal Nortega nga dakung insulto sa gahum sa Sangguniang Panlungsod ang gihimu sa BPLD nga nag-kwestyon sa legalidad sa resolusyon nga ilang gipasar. Niya pa nga bugtong ang korte lamang maoy maka-kwestyon kung legal ba ang gipasar nga resolusyon sa Sangguniang Panlungsod.
Gibasura sa City Prosecutors’ Office ang kasong gipasaka sa PNP Regional Operations Group (RSOG) batok sa nagdala sa sabong sa Brgy. Maug ning syudad sa Butuan gumikan sa kakulangon sa probable cause.
Kini ang desisyon ni Prosecutor Gene Jala ug gimandoan ang kapulisan nga e-release ang mga respondents sa kaso nga gikustodiya sa PNP-RSOG.
Nagsumikad ang kaso dihang gironda sa PNP-RSOG ang sabong sa Brgy. Maug niadtong nakalabyang semana subay sa kasaulogan sa fiesta sa maong barangay luyu pa man nga adunay special permit nga gihatag ang LGU Butuan. Una na’ng gibutyag ni PNP Caraga Reg’l Director P/BGen. Joselito Esquivel, Jr nga test case lamang ang gihimu sa kapulisan aron masuta kung asa ang mas molabaw nga balaod.
Subay niini, nakatakdang ipatawag sa Sangguniang Panlungsod ang tanang milangkob sa raiding team sa RSOG aron mo-esplikar sa maong hitabo ilabina adunay nadawat nga report ang Sanggunian nga gikumot ang special permit ug nagpasalba sa armas ang mga pulis dihang gilusad ang pagpangsikop.
Gitun-an na usab sa mga Konsehal ang posibleng legal nga lakang batok sa PNP RSOG.
