Sa post sa usa ka Ang Lo Rena, giingon niining wala dayon gihatagan og tambal ang iyahang amahan pag-abot sa SMPC niadtong Pebrero 27, 2023, rason nga giingon niini nga usa ka “Killer Hospital” ang maong balay tambalanan.
“Dili nako madawat imo kamatayon Pang, tungod imo kamatayon sakit.. sugod pag sulod nato ug SPMC wala ka gidapatan ug tambal. Hantud namatay nlng ka. Dextrose ug oxygen lng ila ghatag ug gipalingkod raka sa wheelchair from 8am to 9pm ug gibutang sa daplin. Kabalo namn unta cla sa imong finding, ky bago ka namo gidala sa SPMC nka pa X-ray paka,” Facebook post ni Ang Lo Rena.
Sa interbyu sa DXDC RMN Davao kang Dr. Ricardo Audan, SPMC Chief, giklaro niini nga gilayong naatiman ang maong pasyente diin kini gidiretso sa Emergency Room (ER) tungod sa gibati niini kalabutan sa respiratory disease.
Matud ni Audan, gi-oxygen, na-X-ray, ug gihatagan og dextrose ug anti-biotics ang pasyente isip inisyal nga medikasyon.
“Pag ER man gud ka, regardless puno ‘mi, atimanon gyud ka. Ang dili lang masabtan sa mga tawo, sa sobra kadaghan sa pasyente, di man matutokan pud. Ang importante, nakahatag mi’g initial management,” sulti ni Audan.
Usa sa nakitang rason nganong miabot sa maong sitwasyon, tungod sa pagdumili sa kabanay sa pasyente nga tubohan ang ilahang amahan, ug kini mipirma nga dili kini ipa-intubate bisan unsa ang mahitabo.
“Dili sila magpa-intubate. Dili pud sila magpa-NJT (Nasojejunal tube). Kadtong time nga naghihingalo na sya (ang pasyente), we need to intubate. That’s the way to revive, to increase the oxygen. Dili man kaya sa ilong ang oxygen for that. Pero, we respected ang ilang desisyon. I think that’s the real story behind nga wala nakabalo ang publiko na nag-sign sila. Naa ‘mi kamatuoran. Naa ‘mi evidence nga nag-sign sila nga dili sila magpa-intubate,” tataw ni Audan.
Nasubo usab ang SPMC Chief sa pamahayag sa kabanay sa pasyente nga usa ka killer hospital ang balay tambalanan. Aminado ang doktor nga aduna gayoy kakulangan sa personahe sa ospital ilabi na sa ER apan ginabuhat nila ang tanan nga ma-accommodate ang mga pasyente ug mahatagan og inisyal nga medikasyon.
Nasubo ang SPMC official sa statement nga killer ospital ang SPMC tungod kay daghan na og natabangan nga mga pasenyente ang ospital ug ilahang tumong mao ang pagtabang ug pagtambal sa nanginahanglan dili lang sa Davao kundili sa entero Mindanao.
“Very unfair pud ‘to iyang statement nga ang SPMC is a killer hospital. For the record lang, daghan na kaayo’g natabangan ang SPMC throughout Mindanao, not only Davao City. Unta, ma-appreciate pud ninyo ang effort sa doctors and nurses namo sa SPMC kay sakit pud nga musulti mo’g statement nga wala sa among mission and vision,” sulti niini.
RadyoMaN Kirby Manzon
