Davao City – Nagpakitabang ngadto sa admin ang Southern Philippines Medical Center kun SPMC Pediatrics aron makapangayo og dugang mga hospital beds alang sa mga pasyente sa non-infectious cases sama sa dengue.
Kini ang gisaysay sa chief Residential SPMC Pediatrics nga si Dr. Nemia Asiong atol sa Kapehan sa Dabaw diin segun niini nga pati lobby sa Pediatrics gibutangan na og hospital beds gumikan sa nasinatiang congestion resulta sa taas nga kaso sa dengue diin sagad naigo niini mga bata.
Busa tambag sa doktora ngadto sa mga pasyente nga makaya pa ang ilang balatian, kinahanglan muinom ug daghang tubig ug tabangan ang kaugalingon sa pag angkon og lig-on nga immune system gani bisan anaa sa balay, monitoron gihapon ang platelet sama sa pag-adto sa health center sa barangay aron ma-check kini human sa matag unom ka oras.
Apan sumala ni Dr. Asiong nga dili nila kontrolado ang maong panghitabo ug di usab mabalibaran sa ospital ang mga pasyente busa ginapaningkamutan niini nga maakomodar ang mga mangabot.
Samtang ang City Health Office kun CHO padayon nga nagapahinumdom ngadto sa komunidad nga ipadayon ang clean up drive aron di na madungagan pa ang kaso sa dengue sa syudad nga miabot na sa kapin 1,600.
RadyoMaN Renz Barbarona
