Subling nagtigi niadtong Sabado, Nobyembre 26, ang mga sundalo sa gobyerno, mga pulis, mga trabahante sa gobyerno ug mga sakop sa Moro Islamic Liberation Front o MILF didto sa Bacolod, Lanao del Norte.
Dili pinaagi sa pinusilay apan pinaagi sa mga fun games o tigi sa mga tradisyonal nga dula, lakip na basketball nga gitawag og SportsPeace o dula alang sa kalinaw.
Matud pa ni Musa Sanguila, chairman sa Civil Society Organization Lanao del Norte for Peace and Development (CSOLPD), gipahigayon ang maong kalihukan aron ipakita ngadto sa publiko ang paningkamot sa panig sa gobyerno ug sa MILF nga tinud-anay nilang gisuportahan ang nagpadayong panag-istorya sa pagkab-ot sa malungtarong kalinaw sa Mindanao.
Apan giklaro ni Sanguila nga ang pagpahigayon sa SportsPeace dili pagpangampanya sa katawhan sa Lanao del Norte nga botaran ang YES o kaha ang NO sa umaabot nga plebisito sa Bangsamoro Autonomous Region in Mindanao o BARM sa umaabot nga Enero.
Si Bacolod Mayor Joselito Miquiabas miingon nga ang katawhan na maoy magdesisyon kung mosugot sila nga ilakip sa BARM ang unom ka mga lungsod sa Lanao del Norte ug dili momando ang mga opisyal sa kagamhanang lokal ngadto kanila.
Ang sunod-sunod nga SportsPeace gi-organisa sa Armed Forces of the Philippines, pinaagi sa 2nd Mechanized Infantry Brigade, Philippine Army.
Una kining gipahigayon sa lungsod sa Linamon, gisundan sa Maigo ug sa Munai ug ang labing ulahi sa Bacolod. (Divina M. Suson)
| | Virus-free. www.avast.com |
