Sarangani Province—Gibutyag ni Sarangani PNP Provincial Director Police Colonel Michael Lebanan nga sa karon wala pa silay kasayuran kung mahatagan ba ang kapulisan sa Sarangani ug Holiday Break sa Pasko ug bag-ong tuig luyo sa pandemya sa covid 19.
Sumala pa ni Lebanan nga ilaha pang gipa-abot ang desisyon gikan sa higher headquarters kalabutan sa paghatag ug holiday break sa kapulisan.
Apan alang kaniya mas maayo unta nga mahatagan ug break ang kapulisan sa Sarangani aron nga ilang makauban ang ilahang mga pamilya sa pagsaulog sa Pasko ug bag-ong tuig bisan sa hamubo lang nga panahon.
Dugang pamahayag ni Colonel Lebanan nga kon ugaling man mahatagan ug break ang iyang mga sakop tungaon niini ang mga personahe aron dili mapasagdan ang trabaho ug magpadayon ang paghatag ug serbisyo publiko alang sa pagmintinar sa peace and order sa probinsiya.
Hugtanon usab ngagihingusgan sa opisyal nga gibawal pa gihapon sa SPPO ang pagpahigayon ug dagkong panagtigum sama sa Christmas party sa iyang mga personahe gawas lamang kung ang aktibidad nga himoon dunay kalabutan sa ilang trabaho.
Matud pa ni Lebanan nga mas maayong maglikay nalang sa mga social gathering ang iyang mga personahe aron maseguro nga dili mataptan sa makamatay nga corona virus.(RV)
