Spray plane nahagsa sa Pantukan, ‘engine malfunction’ gilantaw nga rason

41

Davao City – Padayon nga giimbestigahan sa otoridad ang nahagsa nga aerial spray plane sa Purok 6, Lower Maubog Tibagon, Pantukan, Davao de Oro alas-6:30 sa buntag kagahapong adlawa (September 23, 2021).
Sa interbyu sa DXDC RMN Davao sa kang Police Colonel Leonard Luna, Director sa Provincial Police Office sa Davao de Oro, giila niini ang piloto sa spray plane nga mao si Captain Lucas Seromines, 65-anyos, residente sa Buhangin, Davao City.
Saysay ni Luna nga alas-11 sa buntag sa dihang na-report sa concern citizen ang insidente sa Pantukan Municipal Police Station (MPS) ug subay sa pag-imbestiga, nga samtang nag-spray og saging ang piloto, kalit na lamang nawad-an og power ang makina sa spray plane hinungdan nga nasangit kini sa kahoy nga Falcata ug nahagsa.
Hinuon, nakahigom lamang og minor injuries ang naasoy nga biktima.
“So, yung plane according to the investigator is total wrecked but the pilot suffered minor injuries. So, umalis agad yung piloto. Initially, ang sabi ay engine malfunction,” saysay ni Luna.
Matud sa police official nga nakig-alayon na usab sila sa Civil Aviation Authority of the Philippines (CAAP) aron nga mapalawman ug masayran ang tinuod nga hinungdan sa insidente.

RadyoMaN Kirby Manzon


Facebook Comments